Полицијата соопшти дека е приведено „лице од интерес“ поврзано со масовното пукање на Универзитетот Браун во американската сојузна држава Род Ајленд, во кое загинаа две лица, а девет беа повредени.

Инцидентот се случи во саботата околу 16 часот по локално време во инженерската зграда „Холи“.

Осомничениот бил уапсен во хотел во текот на ноќта и се наоѓа во полициски притвор, потврдија извори од истрагата. Полицијата соопшти дека станува збор за маж во неговите 30-ти години, кој не бил студент на универзитетот, и дека по приведувањето не се трага по други осомничени.

Универзитетот беше ставен под карантин, кој подоцна беше укинат, а околу 2.000 студенти беа привремено евакуирани.

Претседателката на Универзитетот Браун, Кристина Паксон, изјави дека сите жртви биле студенти и дека семејствата на загинатите добиваат поддршка, додека истрагата продолжува.