Признавам дека беше грешка. Не бев свесна за таа грешка затоа што од мене се бараше да бидам шест месеци в.д. директор на Општата Болница Дебар.

Се каам за стореното и нема да ми се повтори. Ова биле завршните зборови на директорката на дебарската болница, Севдије Коџа, кои ги дала во суд кога признала вина дека за да стане директорка приложила фалсификувана диплома за наводно познавање на англиски јазик.

Пресудата дека е виновна за фалсификување исправа е донесена на 4 октомври годинава, но таа уште е директорка на болницата, пишува Слободен печат.

На 4 октомври заедно со директорката на дебарската болница, вина за фалсификување на ист ваков сертификат, признала уште една поранешна директорка на училиште во скопската населба Драчево.

Ваквите фалсификувани сертификати деновиве се предмет на голем интерес од јавноста, бидејќи освен во досиејата на двете осудени директорки, се наоѓаат и во досиеја на други избрани и именувани лица и чекаат проверка. Двете директорки, на дебарската болница и на училиштето во Драчево, по признанието на вина се осудени на 2 години условна затворска казна.