Руски напад со беспилотно летало ноќеска го остави без струја западниот украински град Тернопил, соопшти регионалната воена администрација, една недела по нападите на Москва кои го прекинаа снабдувањето со електрична енергија во поголемиот дел од градот и областа.

– Тимовите за итни случаи и спасувачите ги отстрануваат последиците од нападот. Снабдете се со вода и наполнете ги телефоните“, напиша Сергиј Надал, шеф на регионалниот штаб за одбрана во Тернопил, на апликацијата Телеграм.

Целосните размери на нападот врз Тернопил, голем град во западна Украина, за сега не се познати.

Воздушната тревога во областа, траела околу 2,5 часа. Во нападот загинало едно лице, а неколку се повредени.

Пред една недела голем дел од градот остана без струја по најголемиот руски напад со беспилотни летала против Украина.

Тернопил е на околу 220 километри источно од Полска. Областа имаше население од повеќе од милион луѓе пред руската инвазија во февруари 2022 година.