САД и Европската Унија постигнаа рамка за нов трговски договор, со што заврши повеќемесечната економска напнатост меѓу двата најголеми глобални трговски партнери.

По директни преговори меѓу претседателот Доналд Трамп и претседателката на Европската комисија Урсула фон дер Лајен во Шкотска, двете страни се согласија на 15% униформна американска царина за сите стоки од ЕУ – значително пониска од претходно најавените 30%.

Иако тарифите сè уште ќе ја поскапат европската стока на американскиот пазар, договорот ги штити некои сектори, како авиоиндустријата, хемикалиите и дел од земјоделските производи, кои ќе бидат ослободени од царини.

Фон дер Лајен изјави дека договорот донесува стабилност и најави инвестиции од ЕУ во САД во вредност од 600 милијарди долари, вклучувајќи и енергетски и одбранбен сектор.

Договорот, кој доаѓа во време на голема глобална економска нестабилност, се оценува како дипломатска и политичка победа за Трамп, особено поради очекуваните приходи од околу 90 милијарди долари од царини.

ЕУ, пак, ги избегнува построгите мерки, но некои европски лидери, како францускиот министер Бенжамен Адад, го оценија договорот како „неурамнотежен“.