Иако трговците се жалеа дека работат надвор од трговската логика и со минимална заработка, реагираа на одлуките на владата за зауздување на инфлацијата во земјава, сепак бројките и анализите на Бизнис мрежата покажаа друга реалност. Во нив стои дека седумте најголеми синџири на маркети во 2023 година оствариле приход од 930 милиони евра.

На водечката позиција меѓу нив е Веро кој во овој период заработил над 10 милиони евра и тоа е речиси 13 отсто повеќе во споредба со претходната година. На второ место е Кам маркет со чиста заработка од 7,3 милиони евра. И овој маркет бележи раст на профитот споредено со годината претходно.

Меѓу оние со големи профити е и Кипер кој во 2023 година заработил 5,5 милиони евра, а по него е Стокомак со профит од четири милиони евра. Вива-Фреш (поранешен Кит-Го) е со слична добивка како Кипер. Рамстор имал добивка од два ипол милиони евра, а Тинекс 1,4 милиони.