„Зелената Ковид-зона“ сè уште е местото каде што се вбројува Македонија. Вака барем тврдат докторите од Комисијата за заразни болести, додека земјава влегува во борба со новиот бран на вирусот. Речиси 50% позитивни од над 1600 тестирања или 788 новозаразени, гласи денешниот биланс од билтенот на Министерството за здравство. Растот на бројките е континуиран и трае неколку денови наназад, но засега не е засилен притисокот врз болничките капацитети. Едноцифрен е бројот на пациенти приклучени на кислородна поддршка на Инфективна. Новитети од следната недела ќе има во инфраструктурните капацитети за преглед и третман на позитивните пациенти.

Во моментов доминира подваријанта на Омикрон, позната како БА.5 која се шири и во регионот. Кај огромен процент од секвенционираните примероци е потврдено нејзиното присуство, потврди вчера ИЈЗ, а потврда денес стигна и од Комисијата за заразни болести. Симптомите се тие што беа присутни кај позитивните и со претходните варијанти на Корона.

Нови препораки и заклучоци од Комисијата за заразни болести денес нема, остануваат само апелите до сите, а особено до оние со послаб имунитет и хронични болести – да носат маска онаму каде што е слабо проветрено и каде што е поголем ризикот од зараза.

Петар Догов