Возовите се целосно уништени, и патничките и товарните. Патничкиот воз се движеше со околу 160км/ч и имаше директен судар. Луѓето беа многу исплашени, не знаеја каде се, вели преживеаниот Василис Полизос.

Најмалку 32 лица го загубија животот, а 85 се повредени во железничката несреќа што се случи доцна синоќа пред полноќ во близина на месноста Темпи кај грчкиот град Лариса, кога од засега непознати причини се судрија товарен и патнички воз.

Еден преживеан тинејџер, кој не го кажа своето име, пред грчките новинари рече дека додека се симнувале од еден од вагоните непосредно пред несреќата почувствувал силно сопирање и видел искри.

„Нашиот вагон не излета од шините, но оние од предниот дел излетаа и беа искршени“, рече тој, видно потресен.

Тој додаде дека првиот вагон се запалил и дека со ташна го скршил прозорецот на неговиот вагон кој бил четврти по ред и избегал.

Железничкиот оператор Hellenic Train соопшти дека во патничкиот воз од Атина до Солун, вториот по големина град во Грција, имало околу 350 патници.

Во коментарите за државната телевизија, Костас Агорастос, регионалниот гувернер на областа Тесалија, го опиша судирот како „многу силен“ и рече дека тоа било „ужасна ноќ“.

„Предниот дел од возот беше уништен. Пристигнаа кранови со специјална опрема за подигање и расчистување на остатоците од вагони. Има остатоци расфрлени насекаде околу местото на несреќата“.

Официјални лица рекоа дека армијата била контактирана за помош.

Hellenic Train е управуван од италијанската FS Group, која ги води железнички услуги во неколку европски земји.