Во експлозија во Москва загина генерал Игор Кирилов, началник на руските трупи за радијациска, хемиска и биолошка заштита, заедно со неговиот помошник. Инцидентот се случил рано утринава, кога експлозивна направа поставена во електричен скутер била активирана пред станбена зграда на Рјазански проспект.

Кирилов беше обвинет од украинското обвинителство за употреба на хемиско оружје против украинските војници во текот на војната, а неговиот воен оддел беше под санкции од Велика Британија, Канада и Нов Зеланд.

Рускиот претседател, Владимир Путин, вчера изјави дека руските трупи имаат предност на целиот фронт во Украина. Посочи дека напредокот на армијата е забрзан, а 2024 година, според него, е „одлучувачка година за постигнување на целите“ на офанзивата во соседната земја.