Запрепастувачко шоу, со неверојатни сцени на бруталност, кое имало за цел да го понижи Зеленски. Ова е оценката на францускиот премиер Франсоа Бајру за средбата на американскиот претседател Доналд Трамп и неговиот украински колега во петокот во Вашингтон. Ја сподели пред француските пратениците за време на денешната парламентарна дебата во Народното Собрание.
Американскиот претседател и денеска го критикуваше Зеленски за изјавата дека „крајот на војната со Русија сè уште е многу далеку“.
„Ова е најлошата изјава што можеше да ја даде Зеленски, а Америка нема да трпи уште долго! Тоа е она што го кажав. Овој човек не сака да има мир, сè додека ја има поддршката на Америка и Европа. На средбата што ја имаа со Зеленски, категорично изјавија дека не можат да ја завршат работата без САД. Веројатно не е одлична изјава што е дадена во смисла на демонстрација на сила против Русија. Што мислат тие?“, напиша Трамп на „Вистина“.
Претседателот на Европскиот совет Антонио Кошта, пак, денеска информираше дека в четврток свикал вонреден Европски совет, на кој е поканет и Зеленски, за одобрување конкретни одлуки на Унијата, со цел таа да ги зголеми своите одбранбени капацитети, за да биде посилна, поавтономна и поспособна да се брани.
„Исто така, да продолжи да ја поддржува Украина за да постигне сеопфатен, праведен и траен мир. Никој повеќе од Украинците не сака мир. И, се разбира, ние ги поддржуваме да го постигнат овој траен мир. Мирот не е само прекин на огнот кој и нуди на Русија повеќе време да дојде повторно посилна. Она што го сакаме е праведен и траен мир“, изјави Кошта.
Ангела Сент, поранешен национален разузнавач за Русија и Евроазија во Националниот разузнавачки совет, рече дека Путин веројатно не брза да ја заврши војната во услови на сè понагласени разлики меѓу Трамп и Зеленски, како и Европа и САД.
Во меѓувреме, Велика Британија се дистанцира од предлогот што го изнезе францускиот претседател Емануел Макрон за едномесечен прекин на огнот во Украина, како на воздух, така и на море и на енергетската инфраструктура. Според „Фајненшл тајмс“, резервираност за идејата за прекин на борбите без безбедносни гаранции изрази и Киев.
Сашко Димовски
