Косовскиот премиер Албин Курти вели дека тоа што се случува во Украина претставува најголема воена агресија од завршувањето на Втората светска војна.

На денешната конференција организирана од Групата за правни и политички студии (ГЛПС), Курти рече дека Косово е ориентирано кон ЕУ и НАТО, како и кон САД и Обединетото Кралство, во поддршка на народот на Украина.

Денеска е тажен ден за Европа. Во овие моменти во Украина се случува руска инвазија, која претставува најголема воена агресија од завршувањето на Втората светска војна. Ние се солидаризираме со народот на Украина и сме ориентирани кон ЕУ и НАТО, како и кон САД и Обединетото Кралство, во поддршка на државниот суверенитет, територијалниот интегритет, независноста на државата и правото на самоопределување на народот на Украина, рече Курти.

Тој информира дека синоќа свикал седница на Советот за национална безбедност, на која е разгледана ситуацијата во врска со руската агресија врз Украина.

Синоќа одржавме седница на Советот за безбедност, на која расправавме за актуелната ситуација и за мерките кои треба да ги преземеме со цел нашата евроатлантска ориентација да биде на највисоко можно ниво, изјави Курти.

На конференцијата на ГЛПС учествуваше и шефот на канцеларијата на ЕУ во Приштина, Томаш Шиниог, кој рече дека Унијата ги осудува руските напади во Украина.

Ова е проблем на безбедноста во Европа и е тажен ден за европската безбедност. ЕУ ги осудува овие напади од страна на Русија во Украина, рече Шиниог.